சென்னை: பினாமி பரிவர்த்தனை தடைச்சட்டத்தின்கீழ், வருமான வரித்துறை மேற்கொள்ளும் நடவடிக்கைகளை எதிர்த்து மேல் முறையீடு செய்வதற்காக மேல் முறையீட்டு தீர்ப்பாயம் உருவாக்கப்பட்டுள்ளது. இந்த தீர்ப்பாயத்தின் நீதித்துறை உறுப்பினராக, இந்திய சட்டப்பணிகள் அலுவலர்களாக உள்ளவர்களை நியமிக்கும் வகையில் 2016ஆம் ஆண்டு சட்டத்திருத்தம் கொண்டு வரப்பட்டது. இதை எதிர்த்து வழக்கறிஞர் வசந்தகுமார் சென்னை உயர் நீதிமன்றத்தில் வழக்குத் தொடர்ந்தார்.
இந்த வழக்கு தலைமை நீதிபதி முனீஷ்வர்நாத் பண்டாரி மற்றும் நீதிபதி பரத சக்கரவர்த்தி ஆகியோர் அடங்கிய அமர்வில் இன்று (ஏப்ரல் 5) விசாரணைக்கு வந்தது. அப்போது, எந்த சட்ட அனுபவமும் இல்லாதவர்களை நீதித்துறை உறுப்பினர்களாக நியமிக்க முடியாது என மனுதாரர் தரப்பில் வாதிடப்பட்டது. ஆனால், இந்த சட்டத் திருத்தத்தை கொண்டு வர மத்திய அரசுக்கு முழு அதிகாரம் உள்ளதாக மத்திய அரசுத்தரப்பில் வாதிடப்பட்டது.
இரு தரப்பு வாதங்களையும் கேட்ட நீதிபதிகள், தீர்ப்பாயங்களின் நீதித்துறை உறுப்பினர்களாக நீதிபதிகளையோ, வழக்கறிஞர்களையோ மட்டுமே நியமிக்க வேண்டும் என உச்ச நீதிமன்றம், 2011இல் தீர்ப்பளித்துள்ளதைச் சுட்டிக்காட்டி, பினாமி பரிவர்த்தனை தடைச்சட்டத்தின் கீழ் அமைக்கப்பட்டுள்ள மேல் முறையீட்டு தீர்ப்பாயத்துக்கு, அரசு அலுவலரை நீதித்துறை உறுப்பினராக நியமிக்க வகை செய்யும் சட்டத்திருத்தம் அரசியல் சட்டத்துக்கு விரோதமானது என அறிவித்து தீர்ப்பளித்தனர்.
உச்ச நீதிமன்றம் 2011இல் பிறப்பித்த தீர்ப்பின் அடிப்படையில் புதிதாக சட்டத்திருத்தம் கொண்டு வர வேண்டும் என மத்திய அரசுக்கு நீதிபதிகள் உத்தரவிட்டனர்.
இதையும் படிங்க: தாது மணல் பதுக்கல்: சிபிஐ பதிலளிக்க நீதிமன்றம் உத்தரவு
